قصيدة استياء من سوداني أصيل الي عربي

--------------------------------------------------------------------------------

القصيدة مناسبتها أن كاتبها رد على أحد منسوبي الدول العربية بعبارة ( نعم يازول ) فجاء رد ذلك العربي عليه مستاءً :
بتقول زول !!؟..ليه شايفني لافي بتاعة على دماغي ؟
( يقصد العمة)
أناالغلطان
تقول لي زول؟!
بقول ليك زول !!
مالو الزول؟
وانت بتعرف إيه للزول ؟
سخيف وجهول
كمان زعلان
خلاص يا سيدي أنا غلطان
شطحت وكنت فاكرك زول
زول الماهو عاجبك ده
الله الخلقو خلقو كده
سمرة لونو من لون طينو
يبقى الفرق بينك و بينو
إنو نضيف و ابيض قلبو
عارف قدرو شاكر ربو
ساتر عرضو ماسك دينو
مخلص أمين وديع و رزين
حشيم القول بديعو رصينو
لطيف وعفيف و كاتلو حنينو
أسد في الحاره
لابختاك و لابرجاك تجيو في عرينو
أكان بى حدره بادرتو
بيتلقاك بى عتره
وبستناك تقول الروب
قبل ما يشممك سكينو
يا بتوب يا بيوسدوك الطوب
والراجل يحمر عينو
كمان بى كلمة بتخاويهو
وبى بسمة بجيك خيرو
لا بتقدر تعيش من دونو
لا بتختاهو لى غيرو
زول الماهو عاجبك ده
بلا توجيه ولا تعليم
أديب و فهيم
هميم وكريم
و فطرة ربو من يوم خلقو
لا فتان و لا خوان
أخو أخوان
بكفي الألف والألفين من الضيفان
ولو اضطر يرهن ولدو
وان ما كفى
باع بيت أهلو والجيران
زول الماهو عاجبك ده
يوم تحتاجلو بتلاقيهو
أكان ورطان وكان جيعان
وكان وجعان وكان سجمان
قبل تتأوه وتناديهو
يمين في أقل من برهه
وبين مد الألف والها
قبل ناسك بجيك حفيان
بضمد جرحك وبداويهو
بكتل أبدرقه بى إيديهو
بطفي الواقده بى رجليهو
ما بتغباههو
لما تدورو بتلاقيو مكان حاريهو
اللافيبا راسو الزول
ومتباهيبه إسمها عمة
سنة سيد الأسياد
المعصوم شفيع الأمة
وسيما الأوليا الزهاد
قلال الزاد كبار الهمة
وتاج العزة والجبرة
ورمز الطيبة والحكمة
والملفوف على المبروكة
إسمو التوب
لباس العفه و الحشمة
أزيدك من فضول القول
ولا خلاص عرفت الزول
ده جمل الشيل
دخري الحوبة
فارس العتمة ساري الليل
لبيب وزكي ونجيب بلحيل
فهيم فهماً يهد الحيل
تقول لي ما فهمت عليك عيد القتو لي تاني !
وأجيب فهامة عاد من وين
كلامي القتو ألماني؟
أخير ليك تمشي تختاني
وتنسى الزول و تنساني
وفوت قبال تعاديني
وأقول اللوح ده عاداني
ويكفي الزول ويكفيني
إني وإنو سوداني
وتحياتي لكل سوداني
والنون حرف قد تشرف انه مسك الختام لأحرف السودان

ناااايس
حاسي كتبها لمصري ما عارف ليه ؟

» اغنية انا افريقي انا سوداني ارض الخير - السودان
» أول سوداني يخضع لعملية زراعة قلب في جراحة
» قصيدة بلاغ امرأة عربية الشاعرة روضة الحاج